Cengiz Dağcınıñ hatırasına. VİDEO

Tegler:

Added: Dınara in category

Medeniyet

Aqmescitteki Qırımtatar milliy teatirinde Zafer Qaratay tarafından çıqarılğan Cengiz Dağcınıñ ayatı ve icadını aydınlatqan filmniñ numayışı ötkerildi. Cengiz Dağcını körmege ve eşitmege, yazıcınıñ özü aytqan hatırlavlarını diñlemek içün halqımız teşrif buyurdı.

Cengiz Dağcı aqqında filmni azırlamaq içün müellifler beş yıl çalıştılar. 2006 senesi iş başlandı. ve niayet bu yıl baarde ilk sefer Türkiyede kösterildi. Qırımda onıñ taqdimi bu künlerge planlaştırılğan edi, lâkin kösterilüvi Cengiz Dağcınıñ vefat etkeninen bir keldi. Numayış hatıra aqşamına çevirildi.

Filimde yazıcı Qırımda cenkten evel yaşağanını, halqınıñ başına tüşken facialar aqqında özü tarif ete. Hayatınıñ meşaqatlı yolunda 1946 senesi Cengiz Dağcı Londnrağa köçmege mecur oldı ve ayatınıñ soñuna qadar yaşadı.

Cengiz Dağcınıñ sınıfdaşı - tehnik ilimleri doktorı Yaqub Bekirov öz hatırlavlarınen paylaştı.

Filmniñ müellifleri - Türkiyede yaşağan belli jurnalistler Zafer ve Neşe Karatay. Türk oquycıları içün Dağcı ziyade belli ve yaqın yazıcıdır.

Bir çoq meselelelerni Cengiz Dağcı özü aydınlata. Onıñ samimimy aytqan sözleri seyircilerni eyecan ve teren tüşüncelerge daldıra.

71 yıl uzaq asretlikte yaşağan bu insan qırımtatar tiline sadıq edi. Londrada yaşap halqınıñ facialı saifelerini bütün dünyağa tanıttırdı.

Uzun yıllar devamında yurtuna asret olğan Cengiz Dağcı niayet Vatanğa qaytarılıp Qırımda balalığı keçken Qızıltaşta defn etilecek. Onıñ cenazesi oktâbrniñ 2-nde Aqmescitniñ Kebir camisinde qılınacaq.

CrimeanTatars.org